Нисэх онгоцны зохион бүтээгч, нисэгч Ховард Хьюзийн бодит амьдралаас сэдэвлэн 'Нисэгч' киног 2004 онд бүтээжээ. Кинонд Ховард Хьюзийн 1920-иод оны сүүлчээс 1940-өөд оны сүүл хүртэлх үеийн амьдралыг үзүүлэх бөгөөд тэрээр нисэх онгоцны салбараас гадна кино урлагт муугүй продюсер байсныг харуулдаг. Гучин насандаа Хьюз Н-1 Racer загварын нисэх онгоцыг зохион бүтээж Беверли Хиллсийн оршин суугчдын дунд шуугиан тарина. Удалгүй жүжигчин бүсгүй Катерина Хепбернд дурлаж хамтдаа амьдрах боловч алдар нэр, хөрөнгө чинээ ихсэх тусам залуу одуудтай зугаацан, гэр бүлийн амьдралаа үгүй хийж удалгүй салцгаана. Түүнийг бага байхад нь ээж нь бохир заваан байдал хүнд, халдварт өвчин тусах эх үндэс шалтгаан болдог гэж хэлснийг Ховард хэт цочирдон хүлээн авч насан туршдаа цэвэрч байхыг эрхэмлэн амьдардаг. Цаг хугацаа өнгөрөх бүр түүний энэ зан улам гаарч гаж зуршил болон эргэн тойрныхоо хүмүүсийг зовоож эхэлнэ.