“Хархны өгөөш”, “Ану хатан”, “Аравт”, “Ларьдма”, “Үргээлэг”, “Луйвар”, “Содура”, “2000”, “Сүүн замын сахиул” зэрэг Монголын орчин цагийн блокбастер кинонуудад чадварлаг дүр бүтээдэг С.Ариунбямбыг олон улсад гарах энтэй жүжигчин хэмээн салбарынхан нь магтдаг. Сөрөг дүрийг сэтгэлд хоногштол бүтээдэг түүний гадаадуудтай хамтарсан төсөл нь цөөнгүй.

2012 онд Казахстаны алдарт найруулагч Акан Сатаевын “Жаужүрек мын бала” буюу “Эрэлхэг мянган хөвгүүд” кино нь түүний олон улсын анхны төсөл байсан юм. Жаужүрек Мың Бала 18-р зууны эхэн үед Монголын Зүүнгарын хаант улс хасагийн овог аймгуудыг эрхшээлдээ байлгаж байх үед хасагууд нэгдэн бослого гаргаж ялсан тухай домог дээр үндэслэн бүтээжээ.

2019 оны зургадугаар сарын 27-ноос Хятадын сувгуудаар цацагдаж эхэлсэн The Longest Day in Chang'an буюу монголчилбол “Чанг Ан-д болсон 24 цаг” хэмээх түүхэн цуврал кино өнөөдрийг хүртэл Хятадын киноны “топ 10”-ийг тэргүүлсээр байна. Уг киноны үйл явдал Тан улсын үеийн нийслэл Чанг Ан-д өрнөх бөгөөд Түрэгийн цэргүүдийн бослогыг дарахаар зэхэж буйгаар эхэлдэг. Тангуд Түрэгүүдийг эзэлснийг эсэргүүцэн боссон сайн дурын шилдэг 50 түрэг баатрын дэд даамал Ма Гэ Ар-ын дүрд жүжигчин С.Ариунбямба тоглосон юм. 2019 оны долдугаар сарын 1-нээс эхлэн тус цуврал Япон, Сингапур, Малайз, Вьетнам зэрэг Азийн бусад орнуудад гарч, Viki, Amazon, YouTube зэрэг видео вэбсайтаар Хойд Америкт гараад байна.

2019 онд Монгол Казахстаны хамтарсан “Сүүн замын сахиул” адал явдалт уран сайхны кино Казахстан болон Монгол Улсад театруудад нээлтээ хийсэн. Уг киноны гол дүрд "Рэкетир" киноны Саяны дүрийг бүтээж дэлхийн үзэгчдэд танил болсон Казахстаны  жүжигчин Саят Исембаев тоглож, бусад голлох дүрд Монголын жүжигчин С.Ариунбямба, С.Болд-Эрдэнэ, А.Баттүшиг, Ц.Төмөрхуяг нар тогложээ.

Харин түүний морь унасан нэгэн постерын зургийг ямар кино болохыг үзэгчид таамаглаж байна. Олон улсын төсөлд оролцдог учраас гадна кино, тэр дундаа Хятад, Өвөрмонголын бүтээл бололтой хэмээн таамаглаж байна. Туг, өмссөн хувцаснаас нь эрт цаг үеийн баатар дайчин хэмээн таамаглаж байна. С.Ариунбямбын бүтээсэн энэхүү киног хүлээх л үлдлээ.